फुलेवाडी रिंग रोड येथील विजय ऊर्फ रिंकू देसाई समर्थक नितीन वरेकर याच्या शिंगणापूर (ता. करवीर) येथील घरावर प्रतिस्पर्धी संतोष बोडके गटाने सोमवारी रात्री जीवघेणा हल्ला (attack) केला. प्रापंचिक साहित्याची तोडफोड व जाळपोळ करून घर पेटविण्याचा प्रयत्न झाला. महिलेला मारहाण करण्यात आली. मंगळवारी दिवसभर परिसरात तणाव होता. या प्रकरणी संशयित राजू बोडके (रा. लक्षतीर्थ वसाहत), उमेश कोळपाटे, विश्वजित फाले (बोंद्रेनगर, रिंग रोड) यांच्यासह सात जणांविरुद्ध करवीर पोलिस ठाण्यात गुन्हा दाखल झाला आहे. संशयितांनी मारहाण केल्याने मीना तानाजी वरेकर (वय 48) जखमी झाल्या. त्यांना शासकीय रुग्णालयात त्यांना दाखल करण्यात आले आहे.
घर पेटविण्याचा प्रयत्न
जमावाने वरेकर याच्या घरातील सीसीटीव्ही, डीव्हीआर, मोबाईल, कपडे, गाद्यांची नासधूस करून साहित्यावर पेट्रोल ओतून घर पेटवून देण्याचा प्रयत्न केला. या घटनेनंतर करवीर पोलिस ठाण्याचे प्रभारी अधिकारी सुरज बनसोडे, स्थानिक गुन्हे अन्वेषणचे निरीक्षक संजय गोर्ले यांच्यासह पोलिसांचा फौजफाटा दाखल झाला. संशयिताचा शोध घेण्यात येत होता.
दोन्हीही गटांच्या म्होरक्यांसह साथीदार कारागृहात वाढदिवसाचे फलक फाडल्याच्या कारणातून तीन महिन्यापूर्वी विजय ऊर्फ रिंकू देसाई व संतोष बोडके समर्थकात वाद उफाळला होता. लक्षतीर्थ वसाहतीमध्ये संतोष बोडकेसह दोघांवर जीवघेणा हल्ला (attack) झाला होता. याप्रकरणी विजय ऊर्फ रिंकू देसाईसह समर्थकांवर खुनाचा प्रयत्न केल्याचा गुन्हा दाखल झाला होता. दोन्हीही गटातील संशयितांची कारागृहात रवानगी करण्यात आली आहे.
