आशिया कपसहित सर्वांनाच वनडे विश्वचषकाचे वेध लागले आहेत. हा विश्वचषक भारतात खेळवला जाणार असल्याने त्याची उत्सुकता अधिक आहे. वनडे विश्वचषकामच्या वेळापत्रकात काही बदल करण्यात आले. यानंतर पुन्हा एकदा संघटनात्मक आणि सुरक्षेच्या कारणास्तव सलग दोन दिवस दोन सामने आयोजित करणे कठीण असल्याचे सांगत HCA म्हणजेच हैदराबाद क्रिकेट असोसिएशनने भारतात ५ ऑक्टोबरपासून सुरू होणाऱ्या एकदिवसीय विश्वचषक स्पर्धेच्या वेळापत्रकात बदल करण्याची मागणी केली होती.
यावर आता बीसीसीआयने आपले मत मांडले आहे.भारतीय क्रिकेट नियामक मंडळाने सोमवारी अधिकृतपणे हैदराबाद क्रिकेट असोसिएशनची आयसीसी विश्वचषक २०२३ च्या वेळापत्रकात बदल करण्याची विनंती नाकारली. बीसीसीआयचे उपाध्यक्ष राजीव शुक्ला यांनी रविवारीच वेळापत्रकात आणखी बदल करणे शक्य नसल्याचे सांगितले होते. “बीसीसीआयचे सचिव जय शाह यांनी आशिया कप संघ निवड बैठकीनंतर दिल्लीत एचसीएच्या अधिकार्यांची बैठक घेतली आणि ९ ऑगस्ट रोजी सुधारित वेळापत्रक जाहीर झाल्यानंतर राज्य युनिटला स्पष्ट केले की त्यानंतर कोणताही बदल केला जाणार नाही, असे बीसीसीआयच्या सूत्राने सांगितले.
बऱ्याच विलंबानंतर यंदाच्या जूनमध्ये वर्ल्डकपचे वेळापत्रक जाहीर करण्यात आले. या महिन्याच्या सुरुवातीला, BCCI आणि ICC (इंटरनॅशनल क्रिकेट काऊंसिल) ने नऊ सामन्यांच्या वेळापत्रकात बदल केले, ज्यामध्ये भारत आणि पाकिस्तान यांच्यातील मोठा सामना देखील समाविष्ट होता. भारत आणि पाकिस्तान यांच्यातील सामना एक दिवस आधी १४ ऑक्टोबरला खेळवण्यात येणार आहे. याशिवाय हैदराबादमधील श्रीलंकेविरुद्ध पाकिस्तानचा सामना १२ ऑक्टोबरऐवजी १० ऑक्टोबर त्याची तारीख करण्यात आली. HCA ९ ऑक्टोबर रोजी न्यूझीलंड विरुद्ध नेदरलँड सामन्याचे आयोजन करत आहे.
सलग दोन सामन्यांसाठी सुरक्षा पुरवण्यावर आक्षेप घेत हैदराबाद पोलिसांनी दोन सामन्यांमध्ये किमान एक दिवसाचा वेळ मागितला होता. यातील बदलांमुळे न्यूझीलंड आणि नेदरलँड संघांच्या प्रवासाच्या वेळापत्रकावरही परिणाम होणार आहे. दोन्ही देशांचे क्रिकेट बोर्ड यासाठी तयार होणार नाहीत. आयसीसीही त्याला मान्यता देणार नाही.
