देशातील पाच प्रमुख बँकांवर रिझर्व्ह बँक ऑफ इंडियाने (RBI) मोठी दंडात्मक कारवाई केली असून, यामध्ये सार्वजनिक क्षेत्रातील बँक ऑफ महाराष्ट्रचाही समावेश आहे. KYC (Know Your Customer) नियमांचे उल्लंघन केल्यामुळे बँक ऑफ महाराष्ट्रवर 31.80 लाख रुपयांचा दंड आकारण्यात आला आहे.
आरबीआयने दिलेल्या माहितीनुसार, देशातील एकूण पाच बँकांनी विविध आर्थिक आणि नियमात्मक चुकांमुळे रिझर्व्ह बँकेच्या निर्देशांचे उल्लंघन केल्याचं आढळून आलं. त्यामुळे या बँकांवर कारवाई करण्यात आली असून, संबंधित बँकांनी भविष्यात नियमांचे काटेकोर पालन करावं, असा इशारा देखील देण्यात आला आहे.
या बँकांवर झाली कारवाई
ICICI बँक – ₹97.20 लाखांचा दंड
सायबर सुरक्षा, कार्ड व्यवहार, आणि KYC नियमांचे उल्लंघन.
Axis बँक – ₹29.60 लाखांचा दंड
ऑफिस अकाउंटच्या अनधिकृत वापरासंदर्भातील नियमभंग.
IDBI बँक – ₹31.80 लाखांचा दंड
किसान क्रेडिट कार्ड संबंधित अनुदान धोरणांचे उल्लंघन.
बँक ऑफ बडोदा – ₹61.40 लाखांचा दंड
ग्राहक सेवा नियमांचे पालन न केल्याबद्दल.
बँक ऑफ महाराष्ट्र – ₹31.80 लाखांचा दंड
KYC प्रक्रियेतील त्रुटी आणि नियमांचे उल्लंघन.
ग्राहकांवर काय परिणाम होणार?
या कारवाईमुळे सामान्य ग्राहकांवर कोणताही आर्थिक किंवा व्यवहारिक परिणाम होणार नाही, अशी स्पष्ट माहिती RBI ने दिली आहे. ही कारवाई केवळ बँकांनी नियमांचे उल्लंघन केल्याबद्दल असून, दंडाची रक्कम बँकेकडून वसूल केली जाणार आहे. ग्राहकांच्या खात्यांवरील सुरक्षा व सेवा यामध्ये कोणताही बदल होणार नाही.
RBI चा संदेश स्पष्ट
RBI ही देशाची केंद्रीय बँक असून सर्व बँकांनी तिच्या मार्गदर्शक तत्त्वांचे पालन करणे बंधनकारक असते. गेल्या काही महिन्यांत आरबीआयने अशा अनेक सहकारी आणि खाजगी बँकांवर दंडात्मक कारवाया केल्या आहेत. काही प्रकरणांमध्ये तर बँकांचे परवानेही रद्द करण्यात आले आहेत.
ही कारवाई केवळ बँकांच्या नियामक गैरपालनामुळे करण्यात आली असून, यामुळे बँकिंग क्षेत्रात पारदर्शकता, सुरक्षा आणि नियमांचे पालन अधिक प्रभावी होईल, असा विश्वास व्यक्त केला जात आहे. ग्राहकांनी घाबरण्याचे काहीही कारण नसले, तरी भविष्यात बँकांनी अधिक जबाबदारीने व्यवहार करण्याची गरज अधोरेखित झाली आहे.
