भारताच्या महत्त्वाकांक्षी चंद्र मोहिमेतील आणखी एक टप्पा यशस्वीरित्या पूर्ण झाला आहे. भारतीय अंतराळ संशोधन संस्था म्हणजेच इस्रोच्या चांद्रयान-३ चे विक्रम लँडर प्रॉपल्शन मॉड्यूलपासून वेगळे झाले आहे. आता लँडर विक्रम चंद्रावर लँड होण्यासाठी एकटेच प्रवास करेल. भारतीय अंतराळ संशोधनाचे पितामह विक्रम साराभाई यांच्या नावाने लँडरचे नाव विक्रम ठेवण्यात आले.
रशियाचे लूना – २५ नंतर भारताचे चांद्रयान- ३ चंद्राच्या भूमीवर उतरण्याची शक्यता आहे. याचे कारण म्हणजे, चांद्रयान- ३ हे लूना- २५ पेक्षा लांबच्या मार्गाने प्रवास करत आहे. चांद्रयान- ३ चा प्रवास हा पृथ्वी आणि चंद्र यांच्या गुरुत्वाकर्षणाचा वापर करून केला जात आहे. यामुळे यानाने कमी इंधनात प्रवास केला आहे. प्रॉपल्शन मॉड्यूलने लँडर विक्रमला त्याच्या योग्य ठिकाणी पोहोचवले. आता सर्वांना प्रतिक्षा २३ ऑगस्टची असून जेव्हा चंद्राच्या दक्षिण ध्रुवावर सॉफ्ट लँडिंग केले जाईल.
जेव्हा प्रॉपल्शन मॉड्यूलपासून लँडर विक्रम वेगळे झाले त्यानंतर इस्त्रोने ट्विट करून ही माहिती दिली. इस्रोने लँडर विक्रमकडून प्रॉपल्शन मॉड्यूलचे आभार व्यक्त केले आहेत. भारताच्या या मोहिमेवर संपूर्ण जगाचे लक्ष आहे. ही मोहिम यशस्वी झाली तर अमेरिका, रशिया आणि चीन यांच्यानंतर चंद्राच्या भूमीवर उतरणारा भारत हा जगातील चौथा देश ठरेल.
चंद्राच्या भूमीवर अवघड अशी सॉफ्ट लँडिंग करण्याचे कौशल्य मिळवणाऱ्या देशांच्या यादीत भारताचा समावेश होईल. चांद्रयान- २ मोहिमेत इस्रोला सॉफ्ट लँडिंगमध्ये अपयश आले होते. तेव्हा विक्रम लँडर सॉफ्ट लँडिंगच्या वेळी ब्रेकींग प्रणालीत झालेल्या गडबडीमुळे चंद्राच्या भूमीवर क्रॅश झाले होते. इस्रोने २००८ साली चांद्रयान-१ मोहिम सुरु केली होती. गेल्या पंधरा वर्षातील भारताची ही तिसरी चंद्र मोहिम आहे. गेल्या एक महिना तीन दिवसांपासून प्रॉपल्शन मॉड्यूलच्या पाठीवर लँडर विक्रम होता. या दोघांची मैत्री श्रीहरिकोटा येथून सुरू झाली आणि दोघांनी एकत्र चंद्राच्या दिशेने प्रवास सुरू केला.
या प्रवासात मग कक्षा बदलायची असो की मार्ग बदलायचा असो दोघांनी एकमेकांची साथ सोडली नाही. पृथ्वीची कक्षा सोडण्याचे असो की चंद्राची गुरुत्वाकर्षण कक्षा पकडणे असो हा सर्व प्रवास मॉड्यूल आणि लँडर यांनी यशस्वीपणे केला. आता देखील जेव्हा लँडरपासून वेगळे होण्याची वेळ आली तेव्हा ही प्रक्रिया देखील ठरल्याप्रमाणे पार पाडली. इस्त्रोच्या ट्विटमधून या दोघांची मैत्री मांडली गेली आहे. लँडरला यशस्वीपणे चंद्राच्या दिशेने सोडल्यानंतर आता प्रॉपल्शन मॉड्यूल अंतराळात गायब होईल. दुसरीकडे लँडर विक्रम चंद्राच्या जमीनीकडे रवाना झाले आहे. आता सर्वांना प्रतिक्षा असेल ती २३ आणि २४ ऑगस्टची जेव्हा चंद्राच्या दक्षिण ध्रुवावर सॉफ्ट लँडिंग केले जाईल.
