आजकाल लोक QR कोड स्कॅन करून ऑनलाईन पेमेंट करतात. मात्र, कधी कधी पेमेंट फेल होते किंवा पैसे चुकीच्या खात्यात जातात. त्यामुळे दुकानदारांना मोठा आर्थिक तोटा होतो. अशाच प्रकारचा एक व्हिडीओ सोशल मीडियावर व्हायरल होत आहे, ज्यात QR कोडच्या माध्यमातून फसवणूक दाखवली आहे.
हा व्हिडीओ इंस्टाग्रामवर आर्यन परवार यांनी शेअर केला आहे. व्हिडीओमध्ये आर्यन अनेक QR कोड्सची प्रिंट काढतो, त्यांना कापतो आणि ते दुकानांवरांच्या QR कोड्स बोर्ड्सवर चिटकवतो. तो एका कपड्याच्या दुकानात जातो आणि दुकानदाराचे लक्ष नसताना स्वतःचा QR कोड चिटकवतो. त्यानंतर तो स्कूटर शोरूम आणि मोबाईल हेडफोन खरेदी करताना हीच युक्ती वापरतो.
आर्यन घरी परतल्यावर त्याच्या मोबाइलवर 2 हजार ते 1 लाख रुपयांचे मेसेज येऊ लागतात. असे वाटते की, काही तासांतच त्याने लाखोंची कमाई केली. जर असे प्रत्यक्षात घडले असते, तर संबंधित दुकानदार कंगाल झाले असते. पण हा व्हिडीओ खऱ्या फसवणुकीचा दाखला नसून, तो फक्त मनोरंजनासाठी तयार केलेला वाटतो. कारण, मोठ्या रकमेचे पेमेंट करताना लोक सहसा खातेदाराचे नाव तपासतात. जर असे घडले असते, तर लगेच हा प्रकार उघडकीस आला असता.
हा व्हिडीओ आतापर्यंत 5 कोटी 12 लाखांहून अधिक वेळा पाहिला गेला आहे आणि लाखो लोकांनी त्याला लाइक आणि शेअर केले आहे. काहींनी हा फेक व्हिडीओ असल्याचे म्हटले आहे. दिनेश नावाच्या व्यक्तीने म्हटले की, “पेमेंट करताना ग्राहकाचे नाव तपासले जाते.” तर साजिद शेख यांनी लिहिले, “पूर्वी मी असेच करत होतो, पण 6 वर्षांची शिक्षा झाली तेव्हा ट्रक चालवू लागलो.”
ऑनलाइन पेमेंट करताना QR कोड स्कॅन करण्याआधी खातेदाराचे नाव आणि इतर तपशील तपासणे अत्यंत गरजेचे आहे. अन्यथा, तुम्हाला आर्थिक फसवणुकीला सामोरे जावे लागेल. QR कोड स्कॅन करताना खातेदाराचे नाव तपासा. सोशल मीडियावर व्हायरल होणाऱ्या सामग्रीवर विश्वास ठेवू नका. ऑनलाईन फसवणुकीपासून सावध राहा.
